Qazma kəmərinin köməkçi hissələri

 Çox hallarda qazma kəmərinin ünsürləri müxtəlif növlü və ölçülü yivlərlə birləşməli olur. Bu zaman keçiricilərdən istifadə edilir.

 Məsələn: FGK markalı keçirici aparıcı borunun yuxarı ucunu fırlanğıcın qidalandırıcı lülə borusuna bağlamaq üçün işlədilir;

 KAK markalı keçirici isə aparıcı borunun aşağı ucunu qazıma borularına bağlamaq üçün tətbiq edilir;

KK markalı keçirici iki müxtəlif nipelli və muftalı ucları birləşdirmək üçün tətbiq edilir;

 MK markalı keçirici iki müxtəlif ölçülü nipelli ucları birləşdirmək üçün tətbiq edilir;

NK markalı keçirici müxtəlif ölçülü 2 muftalı ucları birləşdirmək üçün tətbiq edilir.

K markalı keçirici quyuların sementlənməsində qazma borusu ilə qoruyucu kəməri birləşdirmək üçün tətbiq edilir.

 Qazma zamanı quyudan qazma borusu vasitəsilə qaz-neft təzahürlərinin qarşısını alan əks bağlayıcı klapan qazma kəmərində balta üstündə qıfıl birləşmələri arasında yerləşdirilir.

Qoruyucu rezin halqalar (protektor Bettis halqaları)

 Rotor üsulu ilə qazma zamanı qazma kəməri quyuya buraxılmış qoruyucu kəmərlərin içərisində fırlanmalı olur. Belə hallarda qazma kəmərindəki qıfılların qoruyucu kəmərə dəyib onu zədələməməsi və tez yeyilib sıradan çıxmaması üçün qazma borularına rezin halqalar geydirilir.

 Qəlibləyici, mərkəzləşdirici və sabitləşdirici.

Bunlar rotor, elektrik və xüsusilə turbin qazmasında işlədilir. Hazırda üçşaroşkalı qəlibləyicilərdən daha çox istifadə edilir. Bu, şaquli quyuların qazılmasında kəmərin aşağı hissəsini quyu mərkəzində saxlamağa imkan verir və eyni zamanda quyu divarlarının kələ- kötürlüyünü aradan qaldırmaq və quyu diametrini nominal diametrə qədər bərpa etmək məqsədilə lüləni genişləndirmək üçün lazım olur. Mərkəzləşdiricilər qazma kəmərini quyu mərkəzində saxlamağa xidmət edir. Bunların hər ikisi baltadan və ya qazma turbinindən yuxarıda turbin qazıyıcısından bağlanır və iş şəraitindən asılı olaraq müxtəlif sxemlər üzrə yığılır Son zamanlar maili qazmada quyu əyriliyini sabit saxlamaq məqsədilə sabitləşdiricilər geniş tətbiq edilir.