Neft , qaz və onlardan alınan məhsulların nəql olunması iqtisadi cəhətdən ölkədə neft emalı zavodları və yığım məntəqələrinin harada  yerləşdirilməsindən asılıdır.Neft məhsullarının nəql edilməsi fasiləsiz olmalı, ucuz , minimum itkiyə yol verilməklə başa gəlməlidir.Qazın istehsalı və istehlakı mövsümdən  asılı olaraq dəyişir.

Xam neft məhsulları və qaz üç əsas vasitə ilə:su nəqliyyatı,dəmiryol və boru kəmərləri ilə nəql edilir.Təbii qaz əsas etibarilə borular  vasitəsilə nəql olunur.Böyük miqdarda qaz nəql edilərkən onun aşağı temperaturda(-100°C-dən az) mayeləşdirilmiş şəkildə olması əlverişlidir.Ancaq bu məsələnin bir çox texniki cəhətləri hələlik tam həll edilmədiyi üçün mayeləşdirilmiş qaz boru ilə nəql olunmur.Neft və qaz əsasən boru kəmərləri ilə nəql edilir.Başqa üsullara nisbətən boru kəmərləri ilə nəql olunmanın bir sıra üstünlükləri vardır:

1)boru kəmərləri çox böyük  məsafələrə ən qısa yolla aparıla bilir.

2)fasiləsiz nəqlolunmanı təmin etdiyi üçün  xüsusi yığım məntəqələrinə ehtiyac qalmır.

3)boru kəmərlərində məhsul itkisi başqa  vasitələrə nisbətən minimuma çatır.

4)boru kəmərləri ilə nəqlolunma maksimum mexanikləndirməyə və avtomatlaşdırmaya imkan verir.

Boru kəmərləri ilə nəqlolunmanın mənfi cəhəti onun çox böyük metal sərfi  tələb etməsidir.Boruların vaxtaşırı parafin və başqa çöküntülərdən təmizlənməsi, hermetikliyinin yoxlanılması  və başqa profilaktik tədbirlər boru kəmərinin buraxıcılıq qabiliyyətini artırır və işlənmə müddətini uzadır.Neftlə birlikdə laydan çoxlu miqdarda müxtəlif kimyəvi tərkibli su və başqa maddələr çıxarıldığı üçün neftin nəqlolunmaya hazırlanması mühüm məsələdir.Neftin tərkibində mexaniki qatışıqlar(qum və gil hissəcikləri) olduqda nəqlolunma və emal avadanlığının çirklənməsi,işlənmə müddətinin qısalması və s.xoşagəlməz hallar mümkündür.Neft və qaz nəql edilməzdən əvvəl  sudan, mineral və başqa kimyəvi birləşmələrdən, əlavə qatışıqlardan müxtəlif üsullarla təmizlənir.